Nitre Ngöbö mikaka täte ye käkwe ja sribedre kwin

1. Ngöbö Jehová ye abokän kwin bätä deme. Nitre Ngöbö mikaka täte ye käkwe ja sribedre kwin kukwe ja üaire yebiti, ja mika gure yebiti, ja töi yebiti bätä ja ngrabare yebiti ie niara tö. (1 Pedro 1:16, Kukwe Kuin Ngöbökwe.) Nikwe ja di ngwandre krubäte ne kwe ni tädre kwin Ngöbö okwä känti. Nita nüne kä käme te. Ne mada, nita ja di ngwen ni töi kukwe käme nuainbätä ye rüere. Akwa nikwe ñaka ja di ngwandre nekä.

2. Ja sribedre kwin kukwe ja üaire yebiti: Ni tö Jehová mikai täte angwane, kukwe drieta o kukwe nuainta nitre kukwe ngwarbe driekä Ngöböbätä käkwe ye ni ñaka raba ja töimike nuainne. Nikwe kukwe ngwarbe ye tuanemetre bätä ni ñaka rabadre nekete nitre kukwe ngwarbe driekä Ngöböbätä yekri jire chi. (2 Corintios 6:14-18; Revelación [Apocalipsis] 18:4, Kukwe Kuin Ngöbökwe.) Kukwe metre Ngöbökwe ye rabadre gare nie, bitikäre nikwe ja ngübadrebiti ne kwe nitre kukwe ngwarbe driekä ye käkwe ñaka ni ngökadre. (2 Juan 10, 11.)

3. Ja sribedre kwin ja mika gure yebiti: Jehová tö nitre niara mikaka täte ye käkwe ja ngwandre ni kristiano erametre erere kä jökrä ngwane. (1 Pedro 2:12.) Dre nuainta nikwe ye tuin jökrä ie, jondron nuainta gore ye arato. (Hebreos 4:13.) Ja mika gure ngwarbe bätä kukwe mada käme käme kä nebätä ye nikwe ñaka nuaindre. (1 Corintios 6:9-11.)

4. Ja sribedre kwin ja töi yebiti: Nikwe kukwe kwin bökän mikadre nüke ja töi yebätä, ye angwane nikwe ja ngwandi kwin arato. (Filipenses 4:8, Kukwe Kuin Ngöbökwe.) Akwa nikwe töbikadi jankunu kukwe käme jiebiti, ye känti ni raba nemen mrä kukwe käme nuainne mada. (Mateo 15:18-20.) Jadaka käme kä raba ni töimike käme ye nikwe ñakare nuaindre. Nikwe ja tötikadi Ngöbö Kukweibätä angwane, kukwe kwin mikadi nüke ja töibätä nikwe.

5. Ja ngrabare ye sribedre kwin: Ni kristiano tä blite Ngöbö käbiti, ye medenbätä dängutu nibätä bätä ni ngrabare ye tädre kwin. Ni janandre serbisiote ye biti mada nikwe ja kise bätädrete. Bätä arato mrödre känenkri o kise mikadre jondron kwetadre yebätä, känenkri ja kise bätädrete. Nita nüne ye känti serbisio kwin ñakare angwane, ni radrekrö ye nikwe doboi metadre. (Deuteronomio 23:12, 13.) Nikwe ja ngrabare sribedre kwin ye angwane ni raba ja kriemike bren ruäre yebiti. Ni kristiano ye jue tädre ükaninte kwin mrebe gwita bätä jubäre. Rükadre gare nitre nünanka bäreta yei ja sribere kwin yebiti.

6. Blita kwin: Nitre Ngöbö mikaka täte ye tä käre kukwe metre niekä. Nitre ni ngökö ye käkwe ñaka nünandi Gobran Ngöbökwe yete. (Efesios 4:25, Kukwe Kuin Ngöbökwe; Revelación 21:8.) Ni kristiano ñaka blite käme. Ñakare kukwe käme ye kukwe nuin arato ñakare kukwe käme kötaidre ye kädriere. Nüke gare kwin sribi känti, kwelate bätä nitre nünanka bäre yei blite kwin yebätä. (Efesios 4:29, 31; 5:3.)

Nitre Ngöbö mikaka täte käkwe ja sribedre kwin jondron jökrä känti

Copyright © 2009 Watch Tower Bible and Tract Society of Pennsylvania. All rights reserved.