¿Dre abokän Gobran Ngöbökwe?

1. Jesús nämene Kä tibien nebätä angwane, diribare kwe nitre nänkä ben yei oradre kwetre Ngöböi angwane, Gobran Ngöbökwe ye kärädre kwe. Gobran nieta ye abokän ni gobranka tä ükaninte reire meden gärätä. Gobran Ngöbökwe ye abokän bäri kwin ütiäte krubäte. Tä ükaninte kä kwinbätä bätä gobrandi kwe Kä tibien nebiti. Ngöbö kä ye abokän mikaita deme kwe. Ngöbö tö dre nuainbätä ye mikai nemen bare kwe Kä tibien nebätä, tä nemen bare kä kwinbiti ye erere. (Mateo 6:9, 10, Kukwe Kuin Ngöbökwe.)

2. Ngöbö käkwe käbämikani Jesús ye rabadi Reire Gobran Kwe yete. (Lucas 1:30-33.) Jesús nämene Kä tibien nebätä angwane, bämikani kwe niara rabai Gobrane angwane, töi rabai kwin nikrä bätä kukwe jökrä nuaindi metre kwe. Nikaninta kä kwinbiti angwane, ñakare ükaninte Reire benkwairebe Gobran Ngöbökwe yete. (Hebreos 10:12, 13.) Kä 1914 yete, Jehová käkwe ja di ye biani Jesuye gobrankäre, käbämikani kwe ie ye erere. Ye ngwane ja känenkäre, Jesuta gobrane kä kwinbiti Rei Kwe kädekani ye erere. (Daniel 7:13, 14.)

3. Jehová käkwe arato nitre ruäre brare bätä merire Kä nebätä ja mike täte metre ye dianinkä kwe nänkäre kä kwinbiti. Nitre ye käkwe gobrandi ni jökrä Kä tibienbätä yebiti. Gobrandi kwetre gwairebe Jesube, reire, kukwe ükatekäre bätä sribikäre nikrä ye erere. (Lucas 22:28-30; Revelación 5:9, 10.) Nitre gobranka Jesube Gobran kwete ye Jesukwe kädekani “obeja braibe”. Jökrä täte abokän 144.000. (Lucas 12:32; Revelación 14:1-3.)

4. Jesús namani Reire angwane benkwairebe, Satana bätä angele käme ye juanintari kwe biti kitani Kä tibien nebätä kwe. Ye medenbätä kä 1914 angwane kukwe blo ye kite nirien bäri Käbiti tibien. (Revelación 12:9, 12.) Rü, mrönika, bren, kukwe käme nuainta. . . , kukwe ne jökrä kätä “bämike tuare” nie, Jesuta gobrane bätä kä nibira krüte ni käne. (Mateo 24:3, 7, 8, 12; Lucas 21:10, 11; 2 Timoteo 3:1-5.)

5. Kä nebera chi aune Jesukwe kukwe ükaite ni jökrä Kä tibienbätä yebe bätä ni diainkä mento kwe ni obeja ngübaka kätä obeja bätä kabra denkä jenena ye kwrere. Nitre ja mikaka täte metre gobran Jesukwe yei ye abokän rabai “obeja” kwrere kräke, biti ja nire käre biain kwe ietre nünankäre Kä tibien nebätä. Nitre käkwe ñaka Gobran Ngöbökwe ye kain ngäbiti ye abokän rabai “kabra” kwrere kräke. (Mateo 25:31-34, 46.) Kä ja känenkäre nibira ja ken yete, Jesukwe nitre kabra kwrere ye gaite jökrä. (2 Tesalonicenses 1:6-9.) Mä törba ja tuabätä “obeja” Jesukwe kwrere angwane, dre nieta Gobran Ngöbökwe yebätä ye mä rabadre kukwe nuin biti dre drieta mäi ye erere mäkwe ja ngwandre arato. (Mateo 24:14.)

Gobran Jesukwe yete, ni brukwä ñaka rabai jakrä bätä ja ñaka rabai ruin bäri ütiäte ni madabätä nie

6. Kä tibien ne tä ñäkänintubu jene jene, juta kwatire kwatire te gobran jeñe tä kwetre. Juta kwatire kwatire, tätre rüre jabe kwärikwäri. Akwa Gobran Ngöbökwe ye käkwe gobrandi gobran jökrä Kä tibien nebätä ye täte. Aibe rabai gobrane Kä tibien jökräbiti. (Daniel 2:44.) Ye angwane rü ñaka rabaira, ja kämika ñaka rabaira, kukwe käme ñaka rabaira. Ni jökrä rabai nüne jäme jabe, nünandi keteitebe kwetre kwärikwäri. (Miqueas 4:3, 4.)

7. Jesukwe Gobrandi kä Mil krati näre ye angwane, nitre ja mikaka täte metre ye töi rabai metre biti Kä tibien ne jökrä kwitai kä bä nuäre. Kä mil krati krütai ye angwane, Ngöbö tönamani dre nuainmana ye erere rabai nuainbare Jesuye. Yebiti angwane Gobran ye biainta kwe Rün kwe yei. (1 Corintios 15:24.) Gobran Ngöbökwe käkwe dre nuain, ye ¿ñobätä mä ñaka kädriere ja ketamuko mäkwe yebe bätä mä mräkätre tare mäkwe yebe arato?

Copyright © 2009 Watch Tower Bible and Tract Society of Pennsylvania. All rights reserved.