Pathian Pennak Cu Zeidah A Si?

1. Vawlei cung a rak um lio ah, Jesuh nih amah hnu zultu pawl kha Pathian Pennak caah thlacam awk a rak cawnpiak hna. Pennak pakhat cu singpahrang pakhat nih a hruaimi cozah pakhat a si. Pathian Pennak cu aa thleidangmi cozah pakhat a si. Cucu van ah dirh a si i vawlei kha a uk lai. Pathian min kha a thianter lai. Vancung i tuah a si bangin vawlei cungah Pathian duhnak kha tuah a siter lai.—Matthai 6:9, 10.

2. Jesuh cu a Pennak ah Siangpahrang a si lai tiah Pathian nih bia a kam. (Luka 1:30-33) Jesuh vawlei cung i a rak um lio ah khan, amah cu zangfahnak le dinnak a ngei i a tlingmi Uktu a si lai ti kha a rak langhter. Vancung i a kir ṭhan tikah, Pathian Pennak Siangpahrang cu pek a si colh lo. (Hebru 10:12, 13) 1914 kum ah Jehovah nih bia a kammi nawlngeihnak cu Jesuh kha a pek. Cu caan thawkin cun, Jehovah thimmi Siangpahrang in Jesuh nih vancung ah a uk cang.—Daniel 7:13, 14.

3. Zumhawktlakmi minung cheukhat kha Jehovah nih vancung kai awk in a thim ve hna. Siangpahrang, biaceihtu le tlangbawi in minung kha Jesuh he an uk ṭi hna lai. (Luka 22:28-30; Biathlam 5:9, 10) A Pennak i amah he a uk ṭi hnga dingmi pawl kha Jesuh nih “tuurun hmete” a ti hna. Annih cu 144,000 an si.—Luka 12:32; Biathlam 14:1-3.

4. Jesuh nih Siangpahrang a si cangka in, Satan le a vancungmi miṭhalo pawl kha vancung in vawlei ah a run thlak hna. Cu ruang ahcun 1914 thawk in vawlei cungah thil a ṭhatlo chin lengmangmi hi a si. (Biathlam 12:9, 12) Raldohnak, mangṭam, tlangrai zawtnak, sualnak a karhnak—hi thil vialte hna cu Jesuh nih uknak a thawk cang i hi ningcang cu a hmanung bik ni hna chungah a um cang ti a langhtermi hmelchunhnak cheukhat an si.—Matthai 24:3, 7, 8, 12; Luka 21:10, 11; 2 Timote 3:1-5.

5. A rauh hlanah Jesuh nih minung cu bia a ceih cang hna lai i, tuukhal nih tuu le meheh a ṭhen bangin a ṭhen cang hna lai. “Tuu” cu zumhawktlak in nawlngainak a langhtermi an si lai. Annih cu vawlei cung i zungzal nunnak kha an hmuh lai. “Meheh” pawl cu Pathian Pennak a hlawmi pawl kha an si. (Matthai 25:31-34, 46) A rauh hlanah Jesuh nih meheh bantuk minung vialte cu a hrawh dih cang hna lai. (2 Thesalon 1:6-9) Jesuh a “tuu” hna lak i pakhat si ve na duh ahcun, Pennak kong cu na ngaih lai i na hngalhmi ning tein na tuah awk a si lai.—Matthai 24:14.

Jesuh uknak tangah, huatnak le miphun thleidannak a um ti lai lo

6. Atu ah vawlei cu ram tampi ah aa ṭhen dih. Ram nih anmahle cozah cio an ngei. Hi ram hna cu pakhat le pakhat ral an i do tawn. Sihmanhsehlaw Pathian Pennak nih minung cozah vialte kha a thlen dih hna lai. Mah nihcun vawlei dihlak kha cozah pakhat lawnglawngin a uk lai. (Daniel 2:44) Cutik ahcun raldohnak, sualnak le, zangennak a um ti lai lo. Miphun vialte daihnak le lungrualnak in an nung ṭi dih cang lai.—Mikah 4:3, 4.

7. Jesuh Kum Thongkhat Uknak chungah, zumh awk tlakmi minung cu mitling ah an cang lai i, vawlei dihlak cu paradis ah a cang lai. Kum thongkhat a dih tikah, Pathian nih tuah a fialmi vialte kha Jesuh nih a tuah dih cang lai. Cuhnu ah Pennak kha A Pa sinah a pek ṭhan lai. (1 Korin 15:24) Pathian Pennak nih a tuah hngami kong kha na hawi kawm le na dawtmi vialte hna kha chimh ve hna hngat.

Copyright © 2008 Watch Tower Bible and Tract Society of Pennsylvania. All rights reserved.