Melbalʌl tac mu’ bʌ i ts’a’len Dios

1. Jini xñopt’añob i cha’an Dios mi’ c’uxbiñob chuqui wen, pero yom ja’el mi’ cʌn i ts’a’leñob chuqui mach wen (Salmo 97:10). Jini yom i yʌl cha’an mi lac ts’a’len chuqui mi’ ts’a’len Dios. ¿Baqui tac bʌ lamital jini?

2. Ts’i’lel: Jini mu’ bʌ i pi’leñob i bʌ che’ maxto i cha’leyob ñujpuñijel, yic’ot jini mu’ bʌ i taj i yixic, yic’ot jini mu’ bʌ i pi’len animal tac, yic’ot jini mu’ bʌ i cha’ pʌyob i bʌ cha’ jiñob jach bʌ ti’ yotot, yic’ot jini winicob mu’ bʌ i wʌlʌc pi’leñob i bʌ, jiñʌch mulil wen tsʌts tac bʌ ti’ contra Dios (Levítico 18:6; Romanos 1:26, 27; 1 Corintios 6:9, 10). Mi juntiquil winic yic’ot juntiquil x’ixic chumulobix, pero mach ñujpuñemobic, yom mi’ cʌyob bʌ o mi’ ñujpuñijelob ti juez (Hebreos 13:4).

Dios mi’ ts’a’len jini yʌc’ʌjel, xujch’, alas cha’an ti’ tajol taq’uin yic’ot mich’ajel mu’ bʌ yʌc’onla ti jats’ o tsʌnsa

3. Lot, alas cha’an ti’ tajol taq’uin, xujch’: Jehová Dios mach yujilic lot (Tito 1:2). Jini cha’an, yomo’ bʌ cha’an uts’at mi’ q’uejlelob ti Dios, mach yomic mi’ cha’leñob lot (Proverbios 6:16-19; Colosenses 3:9, 10). Pejtelel jini alas tac cha’an mi lac taj taq’uin mi’ yʌq’ueñonla lac ñumen mulan taq’uin. Jin cha’an jini xñopt’añob ma’anic mi’ yotsañob i bʌ ti alas cha’an lotería mi muq’uic i yʌc’ob taq’uin che’ mi’ cha’len ajñel caballo o yan tac bʌ (Efesios 5:3-5). Ma’anic muc’o ti xujch’ ja’el, yic’ot ma’anic mi’ mʌñob chuqui xujch’ibil tac bʌ, yic’ot ma’anic chuqui mi’ ch’ʌmob majlel che’ maxto i c’ajtibeyob i yum (Éxodo 20:15; Efesios 4:28).

4. Ora bʌ mich’ajel, jats’: Che’ ma’anic mi lac tic’ lac mich’ajel mi’ mejlel yʌc’onla ti jats’ o tsʌnsa (Génesis 4:5-8). Jini xjats’ob ma’anic mi’ mejlelob ti sujtel ti’ yamigo Dios (Salmo 11:5; Proverbios 22:24, 25). Mach wenic mi laj q’uextan, o mi lac cha’ sutq’uin che’ an majqui mi’ melbeñonla chuqui mach wen (Proverbios 24:29; Romanos 12:17-21).

5. Xtic’layajo’ bʌ yic’ot mu’ bʌ i pejcañob espíritujob: Lamital winicob x’ixicob mi’ pejcañob jini espíritujob, cha’an mi’ c’ajtiñob i coltʌntel cha’an mi’ lajmel i c’amʌjelob. Yaño’ bʌ mi’ tic’lañob i contrajob cha’an mi’ c’am’añob i cha’an mi’ tsʌnsañob. Ti’ pejtelel ili mach bʌ wentaquic ti’ melol, ya’an Satanás ti’ pat. Jini cha’an jini xñopt’añob mach yomic mi’ wis melob jini (Deuteronomio 18:9-13). Ba’ mi’ mejlel lac taj laj coltʌntel cha’an jini xtic’layajob, jiñʌch che’ lʌc’ʌl mi la cajñel ti’ t’ejl Jehová (Proverbios 18:10).

6. Yʌc’ʌjel: Ti’ japol ts’ita vino, cerveza o yan tac bʌ mach lecojic (Salmo 104:15; 1 Timoteo 5:23). Pero Dios mach uts’atic mi’ q’uel che’ mi’ jajpel ti pejtel ora o che’ mi’ yʌc’añob (1 Corintios 5:11-13; 1 Timoteo 3:8). Ti’ cʌlʌx japol mi’ mejlel i c’am’esañonla o mi’ jem lac cha’año’ bʌ. Yic’ot ja’el, bʌbʌq’uen ma’ yajlel ti orajach ti yan tac bʌ mulil (Proverbios 23:20, 21, 29-35).

7. Jini winicob x’ixicob mu’ bʌ i melob mach bʌ uts’atic mi’ q’uel Dios, «ma’anic mi’ cajel i yochelob ti’ yumʌntel Dios» (Gálatas 5:19-21). Mi jatet muc’ʌch a c’uxbin Dios ti’ isujm yic’ot a wom a tijicñesʌben i pusic’al, mi caj i mejlel a cʌy ti’ melol chuqui tac mach wen (1 Juan 5:3). Cʌñʌ a ts’a’len mu’ bʌ i yʌl Dios mach wenic (Romanos 12:9). Ñochtan jini winicob x’ixicob weño’ bʌ i melbal (Proverbios 13:20). Jini lac pi’ʌlob ti ñopt’an wen añobix bʌ i ña’tʌbal muq’uix mejlel i coltañonla (Santiago 5:14). Yic’ot ja’el añʌch yambʌ a coltʌntel, jiñʌch oración ti Dios (Salmo 55:22).

Copyright © 2009 Watch Tower Bible and Tract Society of Pennsylvania. All rights reserved.