¿Majqui jini Diablo?

1. Jini t’an «diablo» i sujmlel jiñʌch juntiquil mu’ bʌ i wen cha’len leco bʌ lot ti’ tojlel yambʌ i pi’ʌl. «Satanás» i sujmlel xcontra o xmʌctaya. Ili c’aba’ʌl tac tsa’ aq’uenti jini ñaxan bʌ i contra Dios. Ti’ tejchibal jiñʌch juntiquil toj bʌ ángel chumul bʌ yic’ot Dios ya’ ti panchan, pero che’ jini tsi’ chan’esa i bʌ i tsi’ ñopo i ch’ʌm jini ch’ujutesʌntel cojach bʌ yom mi’ yʌq’uentel Dios (Mateo 4:8-10).

2. Ili ángel, Satanás, tsi’ cha’le t’an yic’ot Eva yic’ot tsi’ c’ʌñʌ juncojt lucum, yic’ot jini i lot, tsi’ mele cha’an mi’ ñusʌben i t’an Dios. Che’ bajche’ iliyi Satanás tsi’ ñopo i chilben i «yajñib» Dios che’ bajche’ yumʌl, cojach bʌ an ti’ wenta jini ñumen Ñuc bʌ Dios. Tsi’ yʌc’ʌ ti ch’ʌmbentel isujm cha’an jini Dios mach wenic bʌ yumʌl ti’ Tojlel winicob x’ixicob. Yic’ot ja’el tsi’ ñopo i yʌl cha’an mi juntiquilic jax wʌ’ ti pañimil xuc’ul mi’ caj i yajñel ti’ tojlel Dios. Che’ tsi’ mele bajche’ jini, tsa’ sujti ti’ contra Dios. Ya’ ba ora tsa’ otsʌbenti i c’aba’ ti Diablo jini Satanás (Génesis 3:1-5; Job 1:8-11; Apocalipsis 12:9).

3. Satanás mi’ ñop i lotin winicob x’ixicob cha’an mi’ ch’ujutesʌntel (2 Corintios 11:3, 14). Junchajp bajche’ mi’ mel jiñʌch che’ mi’ c’ʌn jini mach bʌ isujmic ñopbalʌl. Mi jump’ejl ñopbalʌl mi’ cha’len lot bʌ cʌntesa ti’ tojlel Dios, i sujmlel mi’ ts’ʌctiyel chuqui yom Satanás (Juan 8:44). Jini winicob x’ixicob mu’ bʌ i majlelob ya’ ti mach bʌ isujmic ñopbalʌl, tajol mi’ lon ña’tañob cha’an wolʌch i ch’ujutesañob jini isujm bʌ Dios, pero i sumjlel woli i melbeñob i ye’tel Satanás, come jiñʌch i dios ili pañimil (2 Corintios 4:4).

Jini mach bʌ isujmic ñopbalʌl, yic’ot i pejcʌntel jini espíritujob yic’ot ti’ bajñel c’uxbintel jini tejclum tac mi’ lotin winicob x’ixicob

4. Ti’ pejcʌntel espíritu jiñʌch yambʌ mu’ bʌ i c’ʌn Satanás, cha’an mi’ pʌy ti’ tojlel winicob x’ixicob. Lamital winicob x’ixicob mi’ pejcañob jini espíritujob, cha’an, mi’ coltʌntelob o mi’ tic’lañob yaño’ bʌ, i mi’ wʌn alo’ chuqui mi’ cajel ti ujtel yic’ot mi’ melob milagro tac. Ti pejtelel jini mach bʌ wentaquic ya’an Satanás jini p’ʌtʌl bʌ xjontolil. Mi la com cha’an uts’at mi’ q’uelonla Dios, mach yomic mi la cotsan lac bʌ ti pejcʌntel jini espíritujob (Deuteronomio 18:10-12; Hechos 19:18, 19).

5. Satanás mi’ yʌq’uen i ña’tan winicob x’ixicob ja’el, cha’an i colorlel i pʌchʌlelob ñumen ñuc bajche’ i cha’an yaño’ bʌ, yic’ot mi’ mel cha’an mi’ ch’ujutesan jini yumʌlob. Lamital winicob x’ixicob mi’ ña’tañob, cha’an i tejclumob o i colorlel i pʌchʌlelob ñumen ñuc bajche’ yaño’ bʌ. Pero jini mach i sujmlelic (Hechos 10:34, 35). Yaño’ bʌ mi’ pijtañob cha’an jini yumʌlob mi’ toj’esan i wocol winicob x’ixicob ti pañimil. Che’ bajche’ iliyi mi’ ts’a’leñob i Yumʌntel Dios, jini cojach bʌ mi caj mejlel i jisan lac wocol (Daniel 2:44).

Chʌn ñopo majlel jini Jehová che’ jini mi caj a lʌt’ chuqui mi’ melbeñet jini Satanás

6. Yambʌ bajche’ mi’ lotin winicob x’ixicob Satanás, jiñʌch che’ mi’ yilʌbeñob i pusic’al ti’ mulʌntel chuqui mach wen. Jehová mi’ subeñonla cha’an mach mi lac mel jini mach bʌ wentaquic come yujil cha’an mi’ tic’lañonla (Gálatas 6:7, 8). Tajol lamital yomob cha’an ma’ mel chuqui mi’ melob. Pero yom c’ajal a cha’an jiñʌch Satanás yom bʌ cha’an ma’ mel jini (1 Corintios 6:9, 10; 15:33).

7. Satanás mi mejlel i mel cha’an mi’ tic’lañetob o mi’ contrajiñetob cha’an ma’ cʌy Jehová. Tajol lamital a cʌñʌyo’ bʌ, mi caj i wen mich’añob che’ woli a chajpan jini Biblia. Yaño’ bʌ tajol mi caj i wajleñetob. Pero ¿majqui tsi’ yʌq’ueyet a cuxtʌlel? Satanás yom jach i bʌc’tesañet cha’an ma’ cʌy a ñop Jehová. Mach a cʌy cha’an mi’ mʌlbeñet (Mateo 10:34-39; 1 Pedro 5:8, 9). Che’ ma’ lʌt’ chuqui mi’ melbeñet jini Diablo, mi mejlel a tijicñesʌben i pusic’al Jehová i ma’ pʌs cha’an wolʌch a coltan I yumʌntel (Proverbios 27:11).

Copyright © 2009 Watch Tower Bible and Tract Society of Pennsylvania. All rights reserved.