Jehová Diosan Qhanañchirinakapa—¿khitinakasa ukat kunsa yatichapxi?

Sum jakasiñamwa munapxi

¿Khitinakäpxisa?

SUM Jehová Diosan Qhanañchirinakapax uñt’ayasiñ munapxi. Inas jupanakat maynix utam jak’ankirïchi, irnaqir masimächi, jan ukax kunjamatsa jupanakampix jikisiraksta. Ukat qhanaw thakinakansa qillqatanakampix yatiyasipki. Ukatxa, inas uta punkum liqt’anïpan jupanakampix parlt’araksta.

Chiqpachansa, Jehová Diosan Qhanañchirinakapax sum jakasiñamwa munapxi. Jumampis sum apasiñ munapxaraki. Ukatxa kunsa yatichapxi, kunjam utt’ayatäpxisa, ukat jaqinakatsa jan ukax aka urunakatsa kamsapxisa uk yatiñam munapxaraki. Ukatakiw aka qillqatxa wakiyanipxi.

Jehová Diosan Qhanañchirinakapax jumjamaw jan walt’äwinakansa llakinakansa usuntañanakansa qullqit pist’añanakansa uñjasipxaraki. Janiw jan pantjasirïpkiti, janirakiw Diosjam chiqapäpkisa. Ukampis sapürutjamaw yatiqapxi, ukat Bibliat taqi chuyma yatxatt’asaxa sum jakañatakiw ch’amachasipxi. Ukatxa Diosan munañap lurañatakiw jakäwip Diosar katuyasipxi, ukat ukarjam sarnaqañatakiw ch’amachasipxaraki. Kun lurañatakis Diosan Arupampi ukat qullan ajayumpiw yanapt’ayasipxi.

Iyawsäwinakapax janiw jaqinakan amtat yupaychäwinakarjamäkiti jan ukasti kunjamtï Bibliax yatichki ukarjamaw iyawsapxi, ukaw jupanakatakix juk’ampi askixa. Kunjamtï Apóstol Pablox arskäna ukhamwa amuyapxaraki, jupasti akham sänwa: “Diosax taqi kunsa chiqaparjamaw luraraki, jaqinakax k’arisisipkpansa” sasa (Romanos 3: 4 Qullan Arunaka).* Taqi kunanakatï Bibliat yatichaski ukanakxa wali sum amuyt’apxi, Berea markankirinakjamaw lurapxi, apóstol Pablox jupanakat akham siwa: “Jupanakasti taqi chuymaw Pablompir Silasampirux isch’ukipxäna, sapürurakiw Qillqatanaksa yatxatapxäna uka arunakax chiqapunïpachati janicha” sasa (Hechos 17:11). Ukatwa Jehová Diosan Qhanañchirinakapax taqi yatichäwinakapxa Bibliarjamati janicha sasin sum amuyt’apxi, jupanakan yatichatäskpas janisa, taqi yatichäwinakaw yant’asiñapa sasaw sapxi, jumas ukham amuyt’arakisma ukwa munapxi.

Ukhamasti Bibliax Diosan Arupawa sasaw Jehová Diosan Qhanañchirinakapax sapxi. Biblian 66 libronaka jikxataski ukanakaxa Diosan qullan ajayupamp amuyt’ayatawa ukat chiqpach sarnaqäwinakaw ukan qillqataraki sasaw sapxi. Ukat Jehová Diosan Qhanañchirinakapax Antiguo Tesatamentorux Hebreo Arut Qullan Qillqatanaka sapxiwa ukat Machaq Testamentorusti Griego Arut Qullan Qillqatanaka sapxarakiwa. Griego Arut Qillqatanakarus Hebreo Arut Qillqatanakarus chiqaw sasaw atinisipxi, ukat kunjam qillqatäkitï ukaruw atinisipxi, yaqhip chiqanakaxa uñacht’äwinakampi qillqatarakiwa, ukhamäki ukhaxa, ukarjamaw amuyasxañapa sasaw yatichapxaraki. Ukatxa walja profecía arunakaw phuqasiwayi, yaqhipasti jichhaw phuqasiski ukat jutir urunakansa phuqasiskakiniwa sasaw sapxaraki.

¿KUNATSA DIOSAN SUTIP APAPXI?

Diosan amtäwinakapata Apnaqäwipata ukat taripäwinakapatwa qhanañchapxi, ukatwa Jehová Diosan Qhanañchirinakapa satäpxi. Jichhax uka sutit amuyt’añäni, Dios, Tatitu ukat Taqikun luriri siski uka arunakax rey, general, apnaqiri sisksnas ukham sutiñchanakakiwa, mä marka apnaqirisa “p’iqt’iri, munañani” ukham sutimpis uñt’atarakiwa. “Jehová” sutisti taqi ch’amani, alaxpacha akapacha luririn sutipawa. Traducción del Nuevo de las Santas Escrituras sat Biblianxa Salmo 83:18 qillqatanxa akham siwa: “Jaqinakan yatipxañapataki, jumax Jehová sutinïtama, juma sapakiw uraqpachan taqi munañanïtaxa” sasa.

Nayra hebreo qillqatanxa akhamaw Diosan sutipaxa

Jehová sutixa Hebreo Arut Qullan Qillqatanakanxa niya paqallq waranqa kutiw uñsti (ukat yaqhip Biblianakansti Yavé sasaw uchapxaraki).^# Yaqhip Biblianakansti janiw Jehová sutxa uchapkiti jan ukasti “Dios” jan ukax “Tatitu” sasakiw uchxapxi. Ukampisa waljpach Biblianakanwa Jehová jan ukax Yavé sutxa uchapxaraki. Tradución del Nuevo Mundo sat Biblianxa Isaías 42:8 qillqatax akham siwa: “Nayätwa Jehová Diosaxa, ukaw sutijaxa” sasa.

Isaías 43 jaljan qillqatäki ukhamarjamawa, Jehová Diosan Qhanañchirinakapa satäpxi. Uka jaljansti taqi markanakas mä taripäwin uñjasipkaspa ukham parli, ukat taqi diosanakaruw jawsthapisi, jupanakar arxatir qhanañchirinak irpanipxañapataki, jan ukax Jehová Diosan qhanañchirinakapax kunjamsa arsupxi uk ist’apxañapataki, ukat kawkïris chiqaxa uk yatipxañapataki. Ukatwa Jehová Diosax Qhanañchirinakapatxa akham saraki: “Jumanakäpxtaw nayan qhanañchirinakaxaxa, nayan ajllit sirvirinakaxa, nayaw jumanakar ajllipxsma nayar uñt’apxañamataki, alkatapxañamatakiraki, ukhamat amuyapxañamataki khitïktix nayax uka. Nayat nayrax janiw khiti Diosas utjkänti, ukat qhiparus janipuniw utjkaniti. Naya sapakïtwa [Jehová Diosaxa, NM], nayat yaqhasti janiw qhispiykaspati” sasa (Isaías 43:10,11).

Janïr Jesusax aka Uraqir jutkäna ukhatpachwa Jehová Diosan Qhanañchirinakapax utjänxa. Hebreos 11 jaljanxa iyawsäwin walja jaqinakatwa parlasi, ukat akham siwa: “Ukhamaraki jiwasanakaxa, ukhataqi qhanañchirinakana muyuntatäsaxa, kunatix jark’xäskistu uka taqi jathi ukhamaraki uka jan apaqtir jucha apanukusaxa, pacienciampiy parlapxañäni kunatix wakt’kistu uka jalañxa” sasa (Hebreos 12:1, MT ). Poncio Pilaton jiskt’ataxa Jesusax akham sänwa: “Nayax ukatakiw nasta, ukatakirakiw akapacharux jutta, chiqata qhanañchañataki” sasa. Ukatwa Qillqatanakanxa Jesusat akham sixa: “Khititix chiqapäki, ukhamarak kunsa chiqapapuni arski ukaxa” sasa ( Juan 18:37; Apocalipsis 3: 14, MT). Jesusax arkirinakaparux akham sänwa: “Qullan ajayuw jumanakxar jutani, ukatxa ch’am katuqapxäta. Jumanakasti nayat qhanañchapxitäta Jerusalén markana, Judeana, Samariana, taqi aka uraqpachana” sasa (Hechos 1:8).

Jichhürunakkamaxa Jehová Diosan Qhanañchirinakapax paqallq millón jiläpxiwa, ukat pä patak kimsa tunka suxtani jach’a markanakankapxiwa, Diosan Apnaqäwipax Jesusan amparapankiw sasaw taqinir qhanañchasipki, ukatwa Jehová Diosan Qhanañchirinakapa sat suti apañax jupanakatak wali askixa.

Jehová Diosan Qhanañchirinakapaxa pä patak kimsa tunka suxtani markanakanwa utji ukat paqallq millón jiläpxiwa

*  Jisk’a t’aqakanaxa Qullan Arunaka, 1992, Bibliat apst’atawa, jan ukhamäkanixa qhanañchasiniwa. Kawkhantï MT qillqanakampi qhanañchaskixa Machaka Testamento Bibliat apst’atawa, ukat kawkhantï NM qillqanakampi qhanañchaskixa Traducción del Nuevo Mundo de las Santas Escrituras (con referencias) español aruta apst’atarakiwa.

^#  Qullan Arunaka sat aymar Biblianxa akham sasaw glosario siski ukanxa Diosan sutipat qhanañchi: “[Aka] Biblianxa qillqatarakiwa Diosarux Tatitu satäkaspas ukhama. Hebreo jaqinakax ‘Adonay’ sasaw sapxarakïna, Diosan sutipxa jan aliqaki aytasiñ munapxatapata, jupanakasti Diosan sutipxa walwa respetapxarakïna. Ukatwa Adonay sasaki sapxänxa. Uka aruxa jichhürux Tatitu sañwa munaspaxa, Yavé sasaw Diosarux sapxarakïna, ukampisa uka sutix wali qullanäkaspasa ukhamat uñt’atarakïnwa. Ukatwa Tatitu sasaki sapxänxa” sasa.